!📍 سکھر میں خوفناک حادثہ — ٹرین کی چھت پر سوار مسافر ہائی وولٹیج تاروں سے ٹکرا کر جھلس گئے

سکھر: ریلوے حکام کی غفلت ایک اور دردناک سانحے کا سبب بن گئی۔ جیکب آباد سے کراچی جانے والی سکھر ایکسپریس کے متعدد مسافر اس وقت شدید زخمی ہو گئے جب وہ ٹرین کی چھت پر سوار تھے اور اچانک آرائیں ریلوے اسٹیشن کے قریب ہائی وولٹیج بجلی کے تاروں سے جا ٹکرائے۔

عینی شاہدین کے مطابق، ٹرین کی چھت پر درجنوں مسافر موجود تھے۔ جیسے ہی ٹرین بجلی کی تاروں کے نیچے سے گزری، زور دار چنگھاڑ کے ساتھ کرنٹ لگا اور کئی افراد موقع پر ہی جھلس گئے۔ اطلاعات کے مطابق 11 سے زائد افراد زخمی ہوئے ہیں جن میں سے دو کی حالت انتہائی تشویشناک بتائی جا رہی ہے۔ متاثرہ افراد کو فوری طور پر نزدیکی اسپتال منتقل کر دیا گیا۔

ریلوے ذرائع کا کہنا ہے کہ واقعے کی تحقیقات کا آغاز کر دیا گیا ہے، تاہم ماضی کی طرح اس مرتبہ بھی سیکیورٹی اور مسافروں کی حفاظت کے حوالے سے سنگین سوالات اٹھ گئے ہیں۔

دوسری جانب میرپور ماتھیلو میں ایک مال گاڑی کے پٹری سے اترنے کے بعد ٹرینوں کی آمدورفت میں پہلے ہی شدید تاخیر ہو رہی ہے۔
گرین لائن، عوام ایکسپریس، اور رحمان بابا ایکسپریس سمیت کئی ٹرینیں 4 سے 10 گھنٹے کی تاخیر کا شکار ہیں۔